(一)
國姓開臺不多久,磚城造去真工夫,代先建設南寧府,天興萬年分二區。
明末清初才平定,南寧改號換府城,有看歷史著知影,臺灣全島設三廳。
清朝初時來接管,看做小小的臺灣,臺南府城竹塹縣,屏東恒春平埔蕃。
臺灣都市第一早,臺北號做大加蚋,一府二鹿三艋舺,專是草厝圍籬笆。
街頭巷尾專草厝,無橫無直三腳株,壁虎油蟲逐項有,柱腳更會生蛀龜。
起厝專是土角壁,人的發達未到額,厝頂崁草無崁瓦,時時專點臭油豎。
彼時文化未進步,也無電火暗摸摸,點臭油豎真艱苦,一泡親像火金姑。
黑暗時代無電火,街頭專是爛溝粥,大溝無橋勿會得過,雨來四界嘗例例。
原早精神無帶重,起厝公廳激暗房,厝內逐間有屎桶,六月暑天非常香。
以前頭殼是真定,社會非無無衛生,囝仔鼻流勿會曉鎗,愛哭嘴食無時停。
囝仔鎗鼻拭手掩,街頭巷尾專隘門,暗時甲鬼行相斷,四界無火才勿會光。
古早大厝第一水,起仔另外插竹圍,歹運不時斷著鬼,竹腳黃金一大堆。
時代交通足歹路,大溪無橋舖竹箍,上山落嶺真艱苦,專是竹腳亡仔埔。
早時大路造無透,專是大圳甲圳溝,疲田拋荒發菅草,路邊全部種林投。
本成無車通運送,坐船過水真為難,專行竹腳莿仔巷,黃昏著無過路人。
早時市街未建設,人無現代者呢孽,街頭巷尾真掩貼,璧邊尿壺排歸列。
衛生勿會曉通拼斷,屎尿放勸路中央,戶蠅蚊蟲店塊狀,勸塊生孤煞發毛。
地方全部無整理,交通不便真稀微,臺北較早無都市,街頭巷尾專大埤。
時代市區真荒之,灣街越巷路真窄,也無市場通買賣,考教著去府城街。
滿清時代無整頓,交通不便用帆船,做官食飽倒塊睏,精神想燒阿片煙。
來往交通用船隻,臺灣還無自動車,貨物運搬真奧寄,起水工友來鬥奮。
市內人數是真散,冬天落雪總喊寒,好天帆船若瓦岸,才有工人塊運搬。
專是帆船塊載貨,臺灣出口樟腦茶,溫州粗紙宋米蝦,茶油糖粉甲大麥。
從前臺灣無生產,全部都是看天田,無米著去南洋辦,也無豆餅欠肥丹。
農村勿會曉通耕作,大肥出剩不甘落,瘦田較食發草抱,若要豐收得確無。
黑暗時代人較戇,專是粗夫塊耕農,文人逐個較蘇爽,若中進士足威風。
清朝還無設學校,有錢子孫才會賢,讀書識字通考教,赤子著去奮鋤頭。
(二)
清重文不重武,無設學校著較輸,赤人苦學也是有,十個八個青冥牛。
彼拵專制的時代,人塊黑暗也不知,狀元三年考一擺,讀書望要進秀才。
出士秀才中過面,更去福州考舉人,陰公騭德真要緊,若無冤鬼會纏身。
清朝舉人真貴氣,一舉成名天下知,牌匾文魁大武字,顯祖榮宗煞豎旗。
時代考教有規定,貴賤二字分真明,娼優隸卒不採用,破戒不准上朝廷。
貧窮散赤無要緊,青白無人敢看輕,未人子孫能寸進,下賤永遠做牛民。
古早廉恥真有守,品行各人皆治修,若要考教會瓊究,禁止三教下九流。
清朝制度攏無換,舉人門口豎旗竿,來台五縣鎮一半,若要祭祖回唐山。
這款古例是習慣,原籍攏是帶漳泉,初來經商做小販,有的耕種帶鄉村。
(三)
祖先專是中國人,五十年前留頭鬃,查某縛腳勿會粗重,穿插全部無相同。
想著早時的穿插,彼拵查某縛小腳,鞋底一粒木屐塔,出門真正歹行踏。
有的勇敢縛真細,有的驚痛虎咬雞,行路腳底會講話,著是大腳假小蹄。
查某縛腳古早例,縛著腳骨若薑芽,三寸金蓮真好體,行路親像雲過月。
一款細漢無認份,驚痛縛得疑疑尊,暗時偷流才去睏,大漢勿會輸舢板船。
時代縛腳才大辨,查某穿衫綑欄杆,看著親像靈桌女間,出門勿會行著人牽。
社會黑暗的時拵,男女做堆總有分,身穿衫褲逐領滾,寒天頭殼包黑巾。
時代束縛舊禮教,查某縛腳甲梳頭,平素不曾出門口,千金小姐店繡樓。
查埔頭鬃長大抱,富戶長袍甲羊羔,文人出門戴碗帽,僥倖虱母蠕蠕趖。
若是紳士較幼秀,頭鬃放直生尾溜,水年激燙麵線紐,逐個虱母生歸球。
早時頭鬃真鎮塊,粗夫著因頭鬃螺,查某囝仔未出嫁,頭鬢專結紅凸紗。
查埔熱天赤水褲,通通染澀踏田土,赤人腳巾做頭布,包到頭殼者大箍。
古早的人有較宋,寒天栽穿破裘公,衫褲穿到闊浪浪,驢鰻龐是包拔風。
時代流行霞肚棺,無論紳士或驢鰻,繡龍繡鳳真好看,赤人布袋做雨蒙。
歷代金錢上高貴,世間貧窮真克虧,寄戶鞋襪甲褲褪,粗夫笠仔甲棕簑。
以前查某無路用,平平一個算半丁,比較現代的女性,煞比查埔較才情。
舊時查某無塊看,現代女人做大官,公務人員鎮一半,觀音較高大屯山。
(四)
以前臺灣未開化,淡水船著用人拖,有人討掠船打破,逃來臺灣塊生活。
原早臺灣無人管,平洋荒土專生蕃,明末清初天下亂,國姓才來開臺灣。
(五)
來開臺灣鄭國姓,漢人不降伊滿清,抗拒全師十三省,建設澎湖先屯兵。
國姓少年健身勇,將官逐個真盡忠,身邊伊有五虎將,甘輝萬禮與施良。
五虎逐個盡忠義,林四許昌陳魁奇,陳豹陳典不驚死,清兵逐個都驚伊。
出兵海水起波浪,陳家兄弟領先鋒,海底都會浮龍貢,因何大事未成功。
國姓原籍石井鄭,抵抗清兵數多年,南京失敗方致病,歸天才換伊後生。
民族英雄鄭國姓,堅心守志要復明,人講成敗是天命,死後大權交鄭經。
鄭經才換鄭克爽,戰敗降清才封王,清朝天下歸一統,才有船隻來交通。
(六)
原早開臺鄭國姓,漢人不伏伊滿清,抗拒全師十三省,才建澎湖先屯兵。
成功漢人不降滿,帶兵才來開臺灣,清朝光緒日本反,鴻章寫字去下關。
鴻章下關去寫字,尾手臺灣寫乎伊,咱乎清朝賣去死,害咱艱苦五十年。
(七)
今日好得咱祖國,思著臺灣漢民族,來乎日本著拘束,用心計較來光復。
卅四年祖國到位,索仔來共咱透開,有話今通講透底,不免心肝結歸雷。
留言列表